രാഹുൽ ഗാന്ധിയുടെ വോട്ട് ക്രമക്കേട് ആരോപണം “നാടകം”; ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ

ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ രാഹുൽ ഗാന്ധിയുടെ വോട്ട് ക്രമക്കേട് ആരോപണം “നാടകം” ആണെന്ന് വിമർശിച്ചു. രാജ്യത്തെ തിരഞ്ഞെടുപ്പ് സംവിധാനത്തെയും നടപടിക്രമങ്ങളെയും കുറിച്ച് രാഹുലിന് യാതൊരു ധാരണയും ഇല്ലെന്നും, കോൺഗ്രസ് പ്രവർത്തകരുടെ ശ്രദ്ധ തിരിക്കാനാണ് ഇത്തരത്തിലുള്ള പ്രസ്താവനകൾ നടത്തുന്നതെന്നും അദ്ദേഹം പറഞ്ഞു. വർഷത്തിൽ പല തവണ വിദേശത്തേക്ക് അവധിക്ക് പോകുന്ന ആളാണ് രാഹുൽ ഗാന്ധി; ഇതുവരെ പറഞ്ഞത് അനവധി നുണകളും നാടകങ്ങളുമാണെന്നും അദ്ദേഹം ആരോപിച്ചു.

സുരേഷ് ഗോപിയെ കാണാനില്ലെന്ന പരാതിയോടും രാജീവ് ചന്ദ്രശേഖർ പ്രതികരിച്ചു. “സുരേഷ് ഗോപിയെ കാണാനില്ലെന്ന് പറഞ്ഞ പിതാവുമായി ഞാൻ സംസാരിക്കും. അദ്ദേഹം ഇല്ലെങ്കിലും ഞങ്ങൾ കൂടെയുണ്ടെന്ന് നേരിൽ ചെന്നുപറയും. സുരേഷ് ഗോപി എംപിമാത്രമല്ല, കേന്ദ്രമന്ത്രിയായതിനാൽ നിരവധി തിരക്കുകൾ അദ്ദേഹത്തിന് ഉണ്ടായിരിക്കും” എന്നും അദ്ദേഹം വ്യക്തമാക്കി.

കേന്ദ്രമന്ത്രിയും തൃശൂർ എംപിയും ആയ സുരേഷ് ഗോപിയെ കാണാനില്ലെന്ന ആരോപണവുമായി കെഎസ്‌യു തൃശൂർ ജില്ലാ പ്രസിഡന്റ് ഗോകുൽ ഗുരുവായൂർ മുമ്പ് രംഗത്തെത്തിയിരുന്നു. കന്യാസ്ത്രീകൾ ജയിലിലായിരുന്ന സമയത്ത് അവരെ മോചിപ്പിക്കാൻ ഇടപെടണമെന്ന് വിവിധ വശങ്ങളിൽ നിന്ന് ആവശ്യപ്പെട്ടിരുന്നെങ്കിലും, ആ സമയത്ത് മണ്ഡലത്തിൽ സുരേഷ് ഗോപിയെ കണ്ടില്ലെന്നതാണ് കെഎസ്‌യുവിന്റെ ആരോപണം.

കൂടാതെ, സുരേഷ് ഗോപിയുടെ “തിരോധാനം” സംബന്ധിച്ച് പൊലീസ് അന്വേഷണം നടത്തണമെന്നാവശ്യപ്പെട്ടും, അദ്ദേഹത്തെ ഉടൻ കണ്ടെത്തണമെന്നും കെഎസ്‌യുവിന്റെ പരാതിയിൽ പറയുന്നു. സോഷ്യൽ മീഡിയയിലും വിഷയത്തെക്കുറിച്ച് വ്യാപകമായ ചര്‍ച്ച തുടരുകയാണ്.

Tag: Rahul Gandhi’s vote rigging allegations are a “drama”; BJP state president Rajeev Chandrasekhar