ബലാത്സംഗ കേസിൽ റാപ്പർ വേടന് മുൻകൂർ ജാമ്യം
ബലാത്സംഗ കേസിൽ റാപ്പർ വേടന് മുൻകൂർ ജാമ്യം അനുവദിച്ചു. ഹൈക്കോടതി ജസ്റ്റിസ് ബെച്ചു കുര്യൻ തോമസിന്റെ ഏകബെഞ്ചാണ് വിധി പുറപ്പെടുവിച്ചത്. വിവാഹ വാഗ്ദാനം നൽകി പീഡിപ്പിച്ചുവെന്ന പരാതിയുടെ അടിസ്ഥാനത്തിലാണ് തൃക്കാക്കര പൊലീസ് വേടനെതിരെ കേസ് രജിസ്റ്റർ ചെയ്തത്. അടുത്ത മാസം 9-ന് പൊലീസ് സ്റ്റേഷനിൽ ഹാജരാകണമെന്നും അന്വേഷണവുമായി പൂർണ്ണമായി സഹകരിക്കണമെന്നും കോടതി നിർദേശിച്ചു.
മറ്റ് കേസുകൾ ഉണ്ടായിട്ടും, അവയെല്ലാം സ്വതന്ത്ര സംഭവങ്ങളാണെന്നും ഈ കേസിന്റെ അന്വേഷണ പരിധിയിൽ ഉൾപ്പെടുന്നില്ലെന്നും ഹൈക്കോടതി വ്യക്തമാക്കി. ഉഭയകക്ഷി സമ്മതപ്രകാരമുള്ള ബന്ധം എങ്ങനെ ബലാത്സംഗമായി കണക്കാക്കാനാവുമെന്ന ചോദ്യവും കോടതി പരാതിക്കാരിയോട് ഉന്നയിച്ചു.
2021 മുതൽ 2023 വരെ പല സ്ഥലങ്ങളിലും വിവാഹ വാഗ്ദാനം നൽകി തന്നെ പീഡിപ്പിച്ചുവെന്നായിരുന്നു യുവ ഡോക്ടറുടെ പരാതി. ഇതുകൂടാതെ വേടനു നേരെയുള്ള മറ്റൊരു കേസിൽ, പരാതിക്കാരിയുടെ നേരിട്ടുള്ള മൊഴി പോലീസിന് ഇതുവരെ ലഭിച്ചിട്ടില്ല. ഇ-മെയിൽ വഴിയുള്ള വിവരമാണ് ഉള്ളതെന്നും, ബന്ധപ്പെട്ട സ്ത്രീയുടെ മൊഴി രേഖപ്പെടുത്തിയ ശേഷമേ നടപടികൾക്ക് തുടർ നൽകാനാകൂവെന്നും പൊലീസ് കമ്മീഷണർ വ്യക്തമാക്കി.
Tag: Rapper Vedan granted anticipatory bail in rape case
