സംസ്ഥാനത്തെ കുട്ടികളുടെ സുരക്ഷ; ‘സുരക്ഷാ മിത്രം’ പദ്ധതിയുമായി സർക്കാർ

സംസ്ഥാനത്തെ കുട്ടികളുടെ സുരക്ഷയ്ക്കായി ‘സുരക്ഷാ മിത്രം’ പദ്ധതിയുമായി സർക്കാർ. വിദ്യാഭ്യാസമന്ത്രി വി. ശിവൻകുട്ടി ‘സുരക്ഷാ മിത്രം’ പദ്ധതി ഉദ്ഘാടനം ചെയ്തു. വീട്ടിലും സ്കൂളിലും കുട്ടികൾ നേരിടുന്ന അതിക്രമങ്ങൾ തടയുകയും പ്രശ്നങ്ങൾ തിരിച്ചറിയുകയും ചെയ്യുന്നതാണ് പദ്ധതിയുടെ പ്രധാന ലക്ഷ്യം.

തദ്ദേശ സ്ഥാപനങ്ങളുടെ അടിസ്ഥാനത്തിൽ കുട്ടികൾക്ക് പ്രത്യേക ശ്രദ്ധ നൽകും. ഇതിനായി ഹെൽപ് ബോക്സുകൾ സ്കൂളുകളിൽ സ്ഥാപിക്കുമെന്നും മന്ത്രി അറിയിച്ചു. ഇവയുടെ നിയന്ത്രണം പ്രധാന അധ്യാപികർക്കായിരിക്കും, ഓരോ ആഴ്ചയും പരിശോധന നടത്തും. ജില്ലാ തലത്തിൽ കൗൺസിലർമാരുടെ യോഗം വിളിച്ച് ചേർക്കും, ഇതിൽ വിദ്യാഭ്യാസമന്ത്രിയും പൊതുവിദ്യാഭ്യാസ ഡയറക്ടറും പങ്കെടുക്കുമെന്നും മന്ത്രി വ്യക്തമാക്കി.

കുട്ടികൾ പങ്കുവയ്ക്കുന്ന പ്രശ്നങ്ങൾ ചില അധ്യാപകർ വെളിപ്പെടുത്തുന്നുവെന്ന പരാതിയെ മന്ത്രി ഗുരുതരമായി എടുത്തു. ഇനിയും അത്തരം സംഭവങ്ങൾ ഉണ്ടെങ്കിൽ കർശന നടപടി സ്വീകരിക്കുമെന്ന് മുന്നറിയിപ്പ് നൽകി. 80,000 അധ്യാപകർക്ക് ഫീൽഡ് തല പരിശീലനം നൽകും, പ്രത്യേകിച്ച് കൗൺസിലിംഗിന് പ്രാധാന്യം നൽകിക്കൊണ്ട്. രക്ഷിതാക്കൾക്കായി പ്രത്യേക ക്ലിനിക്കൽ ക്ലാസുകളും സംഘടിപ്പിക്കും.
“അധ്യാപകന്റെ ജോലി പഠിപ്പിക്കൽ മാത്രമല്ല, കുട്ടിയുടെ മാനസികവും സാമൂഹികവുമായ അവസ്ഥ മനസ്സിലാക്കുകയും സംരക്ഷിക്കുകയും ചെയ്യുകയാണ് പ്രധാന ചുമതല,” എന്ന് മന്ത്രി വ്യക്തമാക്കി.

Tag: Safety of children in the state; Government launches ‘Suraksha Mitram’ scheme