‘ഓഫീസിൽവെച്ച് ജോസ് ഫ്രാങ്ക്‌ളിനിൽ നിന്ന് ലൈംഗികാതിക്രമം; മോനേ ഞാൻ ജീവനൊടുക്കുകയാണ്’; വീട്ടമ്മയുടെ ആത്മഹത്യകുറിപ്പ് പുറത്ത്
നെയ്യാറ്റിൻകരയിൽ ആത്മഹത്യ ചെയ്ത വീട്ടമ്മയുടെ കുറിപ്പ് പുറത്തുവന്നു. ആത്മഹത്യാ കുറിപ്പിൽ കോൺഗ്രസ് നേതാവ് ജോസ് ഫ്രാങ്ക്‌ളിനെതിരെ ഗുരുതരമായ ആരോപണങ്ങളാണ് ഉയർന്നിരിക്കുന്നത്. ലോൺ സംബന്ധമായ കാര്യം നോക്കാമെന്ന് പറഞ്ഞ് ഓഫീസിലേക്ക് വിളിച്ചുവരുത്തി ലൈംഗികാതിക്രമം നടത്തിയതാണെന്ന് വീട്ടമ്മ കുറിപ്പിൽ വ്യക്തമാക്കുന്നു.
വീട്ടമ്മ മകനും മകൾക്കും പ്രത്യേകം രണ്ട് കുറിപ്പുകൾ എഴുതി വെച്ചിരുന്നു. അതിൽ മകനെഴുതിയ കുറിപ്പിലാണ് താൻ നേരിട്ട പീഡനത്തിന്റെ വിശദാംശങ്ങൾ രേഖപ്പെടുത്തിയിരിക്കുന്നത്. “മോനേ, ഞാൻ ആത്മഹത്യ ചെയ്യുകയാണ്” എന്ന വാക്കുകളോടെയാണ് കുറിപ്പ് തുടങ്ങുന്നത്. “തനിക്ക് ജീവിക്കണമെന്നുണ്ട്, പക്ഷേ ജോസ് ഫ്രാങ്ക്‌ളിൻ അതിന് സമ്മതിക്കില്ല,” എന്നും അവൾ കുറിപ്പിൽ പറയുന്നു.
കടം തീർക്കാൻ ലോൺ സഹായം വാഗ്ദാനം ചെയ്ത് ജോസ് ഫ്രാങ്ക്‌ളിൻ ഓഫീസിലേക്ക് വിളിച്ചുവെന്നും, ചില ബിൽ കൊണ്ടുവരാൻ ആവശ്യപ്പെട്ടതായും കുറിപ്പിൽ പറയുന്നു. ബിൽ നൽകാൻ പോയപ്പോഴാണ് ലൈംഗികാതിക്രമം നടന്നതെന്നും വീട്ടമ്മ ആരോപിക്കുന്നു. “ഭർത്താവില്ലെന്ന് പറഞ്ഞാൽ ഇങ്ങനെ ചെയ്യാമോ?” എന്ന വേദനാഭരിതമായ ചോദ്യവും അവൾ കുറിപ്പിൽ ഉന്നയിച്ചു. “ഇങ്ങനെ വൃത്തികെട്ട് ജീവിക്കാനാവില്ല… അവൻ തന്നെ ജീവിക്കാൻ സമ്മതിക്കില്ല” എന്നും കുറിപ്പിൽ രേഖപ്പെടുത്തിയിട്ടുണ്ട്.
ഒക്ടോബർ 8-നാണ് നെയ്യാറ്റിൻകരയിൽ ഈ ദാരുണ സംഭവം നടന്നത്. ആദ്യം ഗ്യാസ് സിലിണ്ടറിൽ നിന്നുള്ള ഇന്ധന ചോർച്ചയെത്തുടർന്നാണ് തീപിടിത്തം സംഭവിച്ചതെന്ന് കരുതിയിരുന്നു. എന്നാൽ തുടർന്ന് പൊലീസ് ആത്മഹത്യാ കുറിപ്പ് കണ്ടെത്തി. വീട്ടമ്മയുടെ മരണവുമായി ബന്ധപ്പെട്ട് ജോസ് ഫ്രാങ്ക്‌ളിനെതിരെ പൊലീസ് കേസ് രജിസ്റ്റർ ചെയ്തിട്ടുണ്ട്.
Tag: Sexual harassment by Jose Franklin in the office;; Housewife’s suicide note released
