അണുബോംബ് സ്ഫോടനത്തിന്റെ നടുക്കുന്ന ഓർമ്മകൾ; ഇന്ന് ലോകം ഹിരോഷിമ ദിനം

അണുബോംബ് സ്ഫോടനത്തിന്റെ നടുക്കുന്ന ഓർമ്മകളിൽ ഇന്ന് ലോകം ഹിരോഷിമ ദിനം ആചരിക്കുന്നു. ജപ്പാനിലെ ഹിരോഷിമ നഗരത്തിലാണ് ഒരു രാഷ്ട്രത്തെ മുഴുവൻ തകർക്കാൻ കഴിയുന്ന ആണവായുധം ആദ്യമായി വീഴ്ത്തപ്പെട്ടത്. മനുഷ്യരുടെ മേൽ പരീക്ഷിക്കപ്പെട്ട അതിഭീകരമായ സംഹാരശക്തിയുടെ ആദ്യ ഇരകളായി ഹിരോഷിമയിലെ ജനത മാറി. എൺപത് വർഷങ്ങൾക്കു ശേഷവും ആ ദുരന്തം ലോകത്തെ നടുക്കുന്ന ഓർമ്മയായി നിലനിൽക്കുന്നു.

1945 ഓഗസ്റ്റ് 6-ന്, ജപ്പാൻ സമയം രാവിലെ 8.15-ന്, ലോകത്തെ ചരിത്രം മാറ്റിമറിച്ച സംഭവം നടന്നു. അമേരിക്കയുടെ എനോള ഗേ ബി-29 ബോംബർ വിമാനത്തിൽ നിന്നു ഹിരോഷിമയുടെ മുകളിൽ നിന്നും പതിച്ച “ലിറ്റിൽ ബോയ്” ആണവബോംബ് പൊട്ടിത്തെറിച്ചു. 370 മീറ്റർ ഉയരത്തിൽ പൊട്ടിത്തെറിച്ച ബോംബിന്റെ അഗ്നിഗോളം ആയിരം സൂര്യന്മാർ ഒരുമിച്ച് പൊട്ടിത്തെറിച്ചതുപോലെ ജ്വലിച്ചു. അന്തരീക്ഷോഷ്മാവ് 4,000 ഡിഗ്രി സെൽഷ്യസിൽ എത്തി. നഗരം മുഴുവൻ വെന്തുരുകി; നഗരത്തിലൂടെ ഒഴുകിയിരുന്ന ഓഹിയോ നദി പോലും തിളച്ചു മറിഞ്ഞു. ചൂട് സഹിക്കാനാവാതെ നദിയിലേക്കു ചാടിയവർ വെള്ളത്തിലൂടെ പോലും ജീവൻ രക്ഷിക്കാനാവാതെ വെന്ത് മരിച്ചു. മനുഷ്യചരിത്രത്തിലെ ഏറ്റവും ഭീകരമായ കൂട്ടക്കൊലയായിരുന്നു അത്.

ബോംബർ വിമാനത്തിന്റെ പൈലറ്റായ പോൾ ടിബറ്റ്സ് പിന്നീട് തന്റെ അനുഭവം ഓർത്തെടുക്കുന്നു: “കോ-പൈലറ്റ് എന്റെ തോളിൽ തട്ടി നിലവിളിച്ചു, ‘താഴേക്ക് നോക്ക്!’” – കൊല്ലാൻ നിയോഗിക്കപ്പെട്ടവർക്ക് പോലും ഉലയുന്ന അനുഭവമായിരുന്നു അത്.

ജീവനോടെ രക്ഷപ്പെട്ടവർ അനുഭവിച്ച വേദനക്ക് ഉപമയില്ല. അന്നത്തെ ഹിരോഷിമയിൽ മൂന്നര ലക്ഷം പേർ ഉണ്ടായിരുന്നുവെങ്കിലും, ബോംബ് സ്ഫോടനത്തിൽ മാത്രം 1,40,000 പേർ മരിച്ചു. തുടർന്ന് ദശകങ്ങളോളം ആണവ വികിരണത്തെ തുടർന്ന് കാൻസർ ഉൾപ്പെടെ അനേകം രോഗങ്ങൾ കൊണ്ടും ആയിരങ്ങൾ ജീവൻ നഷ്ടപ്പെടുത്തി.

ഹിരോഷിമയിലെ ആ ദുരന്തം, യുദ്ധത്തിന്റെ ക്രൂരതയും ആണവായുധങ്ങളുടെ ഭീകരതയും ഇന്നും ലോകത്തെ മുന്നറിയിപ്പോടെ ഓർമ്മിപ്പിക്കുന്നു.

Tag: shocking memories of the atomic bomb explosion; Today is Hiroshima Day around the world