ഓണം അടിപൊളിയാക്കാം; സംസ്ഥാന സർക്കാർ സർവീസ് ജീവനക്കാർക്കും അധ്യാപകർക്കും ഒരു ഗഡു ക്ഷാമബത്ത അനുവദിച്ചു

ഓണം മുന്നോടിയായി സംസ്ഥാന സർക്കാർ സർവീസ് ജീവനക്കാർക്കും അധ്യാപകർക്കും ഒരു ഗഡു ക്ഷാമബത്ത അനുവദിച്ചു. സർവീസ് പെൻഷൻക്കാർക്കും ഒരുമാസത്തെ ക്ഷാമബത്ത ലഭിക്കുമെന്ന് ധനമന്ത്രി കെ. എൻ. ബാലഗോപാൽ അറിയിച്ചു. യുജിസി, എഐസിടിഇ, മെഡിക്കൽ സർവീസസ് മേഖലകളിലെ ജീവനക്കാരെയും പെൻഷൻക്കാരെയും ഉൾപ്പെടെ എല്ലാവർക്കും ഡിഎയും ഡിആറും വർധിപ്പിച്ച ആനുകൂല്യം ലഭിക്കും. സെപ്റ്റംബർ ഒന്നിന് ലഭിക്കുന്ന ശമ്പളത്തോടും പെൻഷനോടുമാണ് പുതുക്കിയ തുക ലഭ്യമാകുക.

ഈ തീരുമാനത്താൽ സർക്കാരിന്റെ വാർഷിക ചെലവിൽ ഏകദേശം 2000 കോടി രൂപയുടെ അധികഭാരം ഉണ്ടാകും. ജീവനക്കാരോടും പെൻഷൻക്കാരോടുമുള്ള പ്രതിബദ്ധതയാണ് സർക്കാർ വീണ്ടും തെളിയിക്കുന്നതെന്ന് ധനമന്ത്രി വ്യക്തമാക്കി. ഇത്തവണ അനുവദിക്കുന്നത് വർഷത്തിലെ രണ്ടാമത്തെ ഗഡു ഡിഎയും ഡിആറുമാണ്. കഴിഞ്ഞ വർഷവും രണ്ട് ഗഡുകൾ അനുവദിച്ചിരുന്നു.

കൊവിഡ് കാലത്തെ സാമ്പത്തിക പ്രതിസന്ധികൾക്കിടയിലും മെച്ചപ്പെടുത്തിയ ശമ്പള പരിഷ്കാരത്തിന്റെ ആനുകൂല്യങ്ങൾ നൽകിയത് രണ്ടാം പിണറായി സർക്കാരാണെന്ന് മന്ത്രി ഓർമ്മിപ്പിച്ചു. ഡിഎ ഉൾപ്പെടെയുള്ള ആനുകൂല്യങ്ങൾ 2021–22 സാമ്പത്തിക വർഷത്തിന്റെ തുടക്കത്തിൽ തന്നെ പണമായാണ് ജീവനക്കാർക്കും പെൻഷൻക്കാർക്കും വിതരണം ചെയ്തത്.

Tag: Let’s make Onam special; State government has granted one installment of famine relief to service employees and teachers