ന്യൂനമര്‍ദ്ദം രൂപപ്പെടാൻ സാധ്യത, മലയോര പ്രദേശങ്ങള്‍ അതീവ ജാഗ്രത പാലിക്കണം.
ബംഗാള്‍ ഉള്‍ക്കടലില്‍ ചൊവ്വാഴ്ചയോടെ ന്യൂനമര്‍ദ്ദം രൂപപ്പെടാൻ സാധ്യതയെന്ന് മുഖ്യമന്ത്രി പിണറായി വിജയന്‍. കഴിഞ്ഞ വര്‍ഷങ്ങളില്‍ ഇത്തരം ന്യൂനമര്‍ദ്ദമാണ് അതിതീവ്രമഴയ്ക്ക് ഇടയാക്കിയതെന്ന് മുഖ്യമന്ത്രി അറിയിച്ചു. അതിതീവ്ര മഴ പ്രവചിച്ചിട്ടില്ലെങ്കിലും സര്‍ക്കാര്‍ മുന്നൊരുക്കം ആരംഭിച്ചെന്നും മുഖ്യമന്ത്രി വ്യക്തമാക്കി.
ജൂലായ് 31 ന് ആലപ്പുഴ, കോട്ടയം, എറണാകുളം, ഇടുക്കി ജില്ലകളില്‍ ഓറഞ്ച് അലേര്‍ട്ട് പ്രഖ്യാപിച്ചിട്ടുണ്ട്. തിരുവനന്തപുരം, കൊല്ലം, പത്തനംതിട്ട, തൃശൂര്‍, മലപ്പുറം, കോഴിക്കോട്, കണ്ണൂര്‍ ജില്ലകളില്‍ ശനിയാഴ്ച യെല്ലോ അലേര്‍ട്ടും പ്രഖ്യാപിച്ചിരിക്കുകയാണ്.
ഓറഞ്ച്, യെല്ലോ അലേര്‍ട്ടുകള്‍ പ്രഖ്യാപിക്കപ്പെട്ട ജില്ലകളില്‍ സര്‍ക്കാര്‍ സംവിധാനങ്ങളും പൊതുജനങ്ങളും അതീവ ജാഗ്രത തുടരാന്‍ സംസ്ഥാണ ദുരന്ത നിവാരണ അതോറിറ്റി നിര്‍ദേശിച്ചു. യെല്ലോ അലേര്‍ട്ട് പ്രഖ്യാപിക്കപ്പെട്ടിരിക്കുന്ന ജില്ലകളില്‍ താഴ്ന്ന പ്രദേശങ്ങള്‍, നദീതീരങ്ങള്‍, ഉരുള്‍പൊട്ടല്‍-മണ്ണിടിച്ചില്‍ സാധ്യതയുള്ള മലയോര പ്രദേശങ്ങള്‍ തുടങ്ങിയ ഇടങ്ങളിലുള്ളവര്‍ അതീവ ജാഗ്രത പാലിക്കണം.
