ഇന്ത്യയുമായുള്ള വ്യാപാര ബന്ധം താലിബാന്‍ നിര്‍ത്തിവെച്ചു
ന്യൂഡല്‍ഹി: അധികാരമേറ്റെടുത്തതിന് പിന്നാലെ ഇന്ത്യയുമായുള്ള വ്യാപാര ബന്ധം താലിബാന്‍ നിര്‍ത്തിവെച്ചു. പാകിസ്ഥാനിലേക്കുള്ള അതിര്‍ത്തി താലിബാന്‍ അടച്ചതോടെയാണ് ഇന്ത്യയിലേക്കുള്ള കയറ്റുമതിയും ഇറക്കുമതിയുമടക്കമുള്ള മുഴുവന്‍ വ്യാപാര ഇടപാടുകളും നിര്‍ത്തിവെച്ചത്. ഫെഡറേഷന്‍ ഓഫ് ഇന്ത്യന്‍ എക്‌സ്‌പോര്‍ട്ട് ഓര്‍ഗനൈസേഷന്‍ (എഫ്.ഐ.ഇ.ഒ) ഡയറക്ടര്‍ ജനറല്‍ ഡോ.അജയ് സഹായിയാണ് ഇക്കാര്യം മാധ്യമങ്ങളോട് സ്ഥിരീകരിച്ചത്.
അതെ സമയം അഫ്ഗാനിസ്താനിലെ സംഭവവികാസങ്ങള്‍ സൂക്ഷ്മമായി നിരീക്ഷിച്ചുവരികയാണെന്ന് അജയ് സഹായി പറഞ്ഞു. അവിടെനിന്നുള്ള ഇറക്കുമതി ഇതുവരെ പാകിസ്താനിലൂടെയായിരുന്നു. പാകിസ്താന്‍ വഴിയുള്ള ചരക്ക് നീക്കം താലിബാന്‍ മരവിപ്പിച്ചിരിക്കുകയാണ്. കച്ചവടത്തിലും നിക്ഷേപത്തിലുമടക്കം അഫ്ഗാനിസ്താനും ഇന്ത്യക്കുമിടയില്‍ ദ്വീര്‍ഘകാലമായുള്ള ബന്ധമാണുള്ളത്. എന്നാല്‍ നിലവില്‍ ഇരു രാജ്യങ്ങള്‍ക്കുമിടയിലുള്ള വ്യാപാര ഇടപാടുകള്‍ മരവിച്ചിരിക്കുകയാണ്.
2021 ല്‍ ഇന്ത്യയില്‍ നിന്ന് അഫ്ഗാനിസ്താനിലേക്ക് ഏകദേശം 835 മില്യണ്‍ ഡോളര്‍ ഉല്‍പന്നങ്ങളുടെ കയറ്റുമതിയാണ് നടന്നത്. 510 മില്യണ്‍ ഡോളറിന്‍റെ ഉല്‍പന്നങ്ങള്‍ അഫ്ഗാനിസ്താനില്‍ നിന്ന് ഇറക്കുമതിയും ചെയ്തിരുന്നു ഇന്ത്യ.
പഞ്ചസാര, ഫാര്‍മസ്യൂട്ടിക്കല്‍സ്, തുണിഉല്‍പ്പന്നങ്ങള്‍, തേയില, കോഫി, സുഗന്ധവ്യഞ്ജനങ്ങള്‍ തുടങ്ങിയവയാണ് കയറ്റുമതി ചെയ്തിരുന്നത്. എന്നാല്‍ ഡ്രൈഫ്രൂട്ട്സും ഉള്ളിയുമടക്കമുള്ളവയാണ് അഫ്ഗാനില്‍ നിന്ന് ഇറക്കമുതി ചെയ്യുന്നതെന്ന് സഹായി പറഞ്ഞു. ഇതിനു പുറമേ,ഏകദേശം മൂന്ന് ബില്യണ്‍ ഡോളറിന്‍റെ നിക്ഷേപവും ഇന്ത്യക്ക് അഫ്ഗാനിസ്താനിലുണ്ട്. 400 ഓളം പദ്ധതികളുമുണ്ട്. നിലവിലുണ്ടായ പ്രതിസന്ധി ഉടനെ പരിഹരിക്കാനാകുമെന്ന പ്രതീക്ഷയിലാണ് രാജ്യമെന്നും അദ്ദേഹം കൂട്ടിച്ചേര്‍ത്തു
