ആഴ്ച്ചയില്‍ 55 മണിക്കൂറില്‍ കൂടുതല്‍ നിങ്ങള്‍ ജോലി ചെയ്യുന്നുണ്ടോ ? കരുതല്‍ വേണമെന്ന് ലോകാരോഗ്യ സംഘടന
ജനീവ: പ്രതിദിനം തുടര്‍ച്ചയായി എത്ര മണിക്കൂര്‍ നിങ്ങള്‍ ജോലി ചെയ്യുന്നുണ്ട് ? സമയം ഏറെ കൂടുതലാണെങ്കില്‍ മരണം വരെ സംഭവിക്കുമെന്ന മുന്നറിയിപ്പുമായി ലോകാരോഗ്യ സംഘടന. ജോലി സമയം കൂടിയതിനെ തുടര്‍ന്ന് മസ്തിഷ്കാഘാതം, ഹൃദയാഘാതം എന്നിവ മൂലം 2016 ല്‍ മാത്രം ലോകത്ത് 745,000 പേര്‍ മരിച്ചതായി എന്‍വയറണ്‍മെന്‍റ് ഇന്‍റര്‍നാഷനല്‍ ജേണല്‍ പ്രസിദ്ധീകരിച്ച റിപ്പോര്‍ട്ട് ചൂണ്ടിക്കാട്ടുന്നു .2000ലെ കണക്കുകളെക്കാള്‍ 30 ശതമാനം കൂടുതലാണിത് .
അതെ സമയം മരണപ്പെട്ടവരില്‍ കൂടുതലും മധ്യവയസ്കരോ വൃദ്ധരോ ആയ പുരുഷന്മാരാണ്. യുവത്വത്തില്‍ ഇതിനോടു പൊരുത്തപ്പെട്ടു നില്‍ക്കാന്‍ ശരീരത്തിനാകുമെങ്കിലും പിന്നീട് സ്ഥിതി വഷളായേക്കും .അതോടെയാണ് മരണം വരെ സംഭവിക്കുന്നത്.
ഒരാഴ്ചയില്‍ 55 മണിക്കൂറും അതില്‍ കൂടുതലും ജോലിയെടുക്കുന്നത് ഗുരുതരമായ ആരോഗ്യ പ്രശ്നമുണ്ടാക്കുമെന്ന് ലോകാരോഗ്യ സംഘടന പരിസ്ഥിതി, ആരോഗ്യ വിഭാഗം ഡയറക്ടര്‍ മരിയ നെയ്റ വെളിപ്പെടുത്തി . ജപ്പാന്‍, ചൈന, ആസ്ട്രേലിയ തുടങ്ങിയ രാജ്യങ്ങള്‍ ഉള്‍പെടുന്ന തെക്കു കിഴക്കന്‍ ഏഷ്യ, പശ്ചിമ പസഫിക് മേഖലകളിലുള്ളവരിലാണ് സ്ഥിതി ഗുരുതരമായി റിപ്പോര്‍ട്ടുകള്‍ വെളിപ്പെടുത്തുന്നത് .
ഒരാഴ്ചയില്‍ 55 മണിക്കൂറില്‍ കൂടുതല്‍ ജോലി ചെയ്യുന്നത് മസ്തിഷ്കാഘാതത്തിന് 35 ശതമാനവും ഹൃദ്രോഗത്തിന് 17 ശതമാനവും അധിക സാധ്യതയുണ്ടെന്നും റിപ്പോര്‍ട്ട് വ്യക്തമാക്കുന്നു. 2000- 16 വര്‍ഷങ്ങള്‍ക്കിടയിലെ കണക്കുകളാണ് ലോകാരോഗ്യ സംഘടന പരിശോധിച്ചത്. കോവിഡ് പ്രതിസന്ധിയില്‍ ജോലി സമയം പല വിഭാഗങ്ങള്‍ക്കും ഏറെ കൂടുതലായതിനാല്‍ കരുതല്‍ വേണമെന്ന് ലോകാരോഗ്യ സംഘടന മേധാവി അദനം ഗെബ്രിയസൂസ് നിര്‍ദേശിച്ചു .
