ഖത്തറിന് നാറ്റോ മാതൃകയിൽ സുരക്ഷാ ഉറപ്പുകൾ നൽകി ട്രംപ്; ആവശ്യമെങ്കിൽ സൈനിക ഇടപെടലുകൾ നടത്തും
ഖത്തറിന് നാറ്റോ മാതൃകയിൽ സുരക്ഷാ ഉറപ്പുകൾ നൽകി അമേരിക്കൻ പ്രസിഡന്റ് ഡൊണാൾഡ് ട്രംപ്. ഇതിനായി പ്രത്യേക എക്സിക്യൂട്ടീവ് ഉത്തരവിൽ ഒപ്പുവച്ചു. ഖത്തറിനെതിരായ ഏതൊരു ആക്രമണവും യുഎസിനോടുള്ള ഭീഷണിയായി കാണുമെന്നും, ഖത്തറിന്റെ പരമാധികാരത്തെയും അടിസ്ഥാന സൗകര്യങ്ങളെയും ബാധിക്കുന്ന സായുധ ആക്രമണങ്ങളെ യുഎസ് പ്രതികരിക്കുമെന്നും ഉത്തരവിൽ പറയുന്നു.
ഇസ്രയേൽ ദോഹയിൽ ഹമാസ് നേതാക്കളെ ലക്ഷ്യമിട്ട് നടത്തിയ വ്യോമാക്രമണത്തിന് ശേഷമായിരുന്നു ഈ തീരുമാനം. ഖത്തറിനെതിരായ ആക്രമണം ഉണ്ടെങ്കിൽ യുഎസ് നയതന്ത്ര, സാമ്പത്തിക, ആവശ്യമെങ്കിൽ സൈനിക ഇടപെടലും നടത്തും എന്ന് ട്രംപ് വ്യക്തമാക്കി.
ദോഹയിലെ ആക്രമണത്തിന് പിന്നാലെ, ഇസ്രയേൽ പ്രധാനമന്ത്രി നെതന്യാഹു ഖത്തർ പ്രധാനമന്ത്രിയോട് മാപ്പു പറഞ്ഞിരുന്നു. ഖത്തർ വെടിനിർത്തൽ സ്വീകരിച്ചതിന് പിന്നാലെ ഉണ്ടായ ആക്രമണത്തെ തുടർന്ന്, ട്രംപ് ഖത്തറിന് ഉറപ്പ് നൽകുന്ന നിലപാട് സ്വീകരിച്ചതായി വിലയിരുത്തപ്പെടുന്നു. മുമ്പ് ഖത്തറിനെ പിന്തുണയ്ക്കാത്ത നിലപാട് സ്വീകരിച്ചതിനാലാണ് ട്രംപിന്റെ പുതിയ തീരുമാനം ഏറെ ശ്രദ്ധ നേടുന്നത്.
യുഎസ് ഇതിനുമുമ്പ്, 2022-ൽ ഖത്തറിനെ “പ്രധാന നോൺ-നാറ്റോ സഖ്യകക്ഷി” ആയി പ്രഖ്യാപിച്ചിരുന്നു. ഇതിലൂടെ അമേരിക്കൻ ആയുധങ്ങൾ സ്വന്തമാക്കാനുള്ള അനുമതി ഖത്തറിന് ലഭിച്ചിരുന്നുവെങ്കിലും പരസ്പര പ്രതിരോധ വ്യവസ്ഥകൾ അതിൽ ഉണ്ടായിരുന്നില്ല. സൗദി അറേബ്യക്കും യുഎസിൽ നിന്ന് സമാനമായ സുരക്ഷാ ഉറപ്പുകൾ ആവശ്യപ്പെട്ടിരുന്നെങ്കിലും, ബൈഡൻ ഭരണകാലത്ത് നടന്ന ചർച്ചകൾ ഫലപ്രദമായിരുന്നില്ല.
ട്രംപിന്റെ നീക്കം ഇസ്രയേൽ- ഖത്തർ സംഘർഷം കുറയ്ക്കാനും ഗാസയിലെ വെടിനിർത്തൽ ഉറപ്പാക്കാനും ലക്ഷ്യമിട്ടതാണെന്ന് വിലയിരുത്തപ്പെടുന്നു. ഹമാസ് പ്രതിനിധികളെ വധിക്കാനുള്ള ഇസ്രയേലിന്റെ ശ്രമം പരാജയപ്പെട്ടതിനെത്തുടർന്ന്, ഖത്തർ തങ്ങളുടെ പരമാധികാരം ലംഘിച്ചതായി പരാതി ഉന്നയിക്കുകയും മധ്യസ്ഥ ചർച്ചകൾ താൽക്കാലികമായി നിർത്തുകയും ചെയ്തിരുന്നു. പിന്നീട് നെതന്യാഹുവിന്റെ മാപ്പ് വിളിയും, വൈറ്റ് ഹൗസ് പുറത്തിറക്കിയ 20 പോയിന്റ് സമാധാന-പുനർനിർമാണ പദ്ധതിയും അതിന്റെ ഭാഗമായിരുന്നു.
അതേസമയം, ഗൾഫ് മേഖലയിലെ സ്വാധീനം വർധിപ്പിക്കാനുള്ള രാഷ്ട്രീയ നീക്കമാണ് ട്രംപിന്റെ ലക്ഷ്യം എന്ന് വിമർശനങ്ങളുമുണ്ട്. കഴിഞ്ഞ മെയ് മാസത്തിൽ ട്രംപ് ഖത്തർ സന്ദർശിച്ചപ്പോൾ, ഖത്തർ നേതൃത്വം 400 മില്യൺ ഡോളർ വിലവരുന്ന ആഡംബര വിമാനം യുഎസിന് സമ്മാനിക്കുകയും, ട്രംപ് ബ്രാൻഡഡ് ഗോൾഫ് റിസോർട്ടിനും മറ്റ് ബിസിനസ് ഇടപാടുകൾക്കും വഴിയൊരുക്കുകയും ചെയ്തിരുന്നു.
Tag: Trump gives NATO-style security guarantees to Qatar; will use military intervention if necessary
