റേഡിയേഷനിൽ നിന്ന് രക്ഷ നേടാൻ പശുവിന്റെ ചാണകം: ഭൂകമ്പം ഉണ്ടാകുന്നത് പശുക്കളെ കൊല്ലുന്നതുകൊണ്ട്; യുജിസി സ്റ്റഡി മെറ്റീരിയൽ
തദ്ദേശീയ പശു ശാസ്ത്ര പരീക്ഷ നടത്തണമെന്ന് വൈസ് ചാൻസലർമാരോട് ആവശ്യപ്പെട്ട് യുജിസി. ഈ മാസം അവസാനം പരീക്ഷ നടത്താനാണ് ആവശ്യം. ഇന്ത്യയിലെയും റഷ്യയിലെയും ന്യൂക്ലിയർ സെന്ററുകളിൽ റേഡിയേഷനിൽ നിന്ന് രക്ഷ നേടാൻ പശുവിന്റെ ചാണകമാണ് ഉപയോഗിക്കുന്നതെന്ന് പരീക്ഷയ്ക്കുള്ള സ്റ്റഡി മെറ്റീരിയലിൽ പറയുന്നു.
രാഷ്ട്രീയ കാമധേനു അഭിയാന്റെ നേതൃത്വത്തിലാണ് രാജ്യവ്യാപകമായി പരീക്ഷകൾ സംഘടിപ്പിക്കുന്നത്. ഈ പരീക്ഷകളാണ് എല്ലാ യൂണിവേഴ്‌സിറ്റികളിലും കോളജുകളിലും നടത്തണമെന്ന് യുജിസി നിർദേശിച്ചിരിക്കുന്നത്. ഇത് സംബന്ധിച്ച കത്ത് എല്ലാ യൂണിവേഴ്‌സിറ്റികൾക്കും നൽകിയിട്ടുണ്ട്. പരമാവധി വിദ്യാർത്ഥികളെ ഈ പരീക്ഷയെഴുതാൻ പ്രേരിപ്പിക്കണമെന്നും നിർദ്ദേശമുണ്ട്.
പശുവിന്റെ ഗുണങ്ങളുമായി ബന്ധപ്പെട്ടുള്ളവയാണ് പരീക്ഷയ്ക്കുള്ള സ്റ്റഡി മെറ്റീരിയലുകൾ. ആണവ വികിരണങ്ങളിൽ നിന്നും രക്ഷപെടാൻ ചാണകം കവചമായി ഉപയോഗിക്കാം. ഭോപ്പാലിൽ അണുവികിരണം ഉണ്ടായപ്പോൾ ചാണകം ഉപയോഗിച്ചതുകൊണ്ടാണ് നിരവധിയാളുകൾ രക്ഷപ്പെട്ടതെന്നും സ്റ്റഡി മെറ്റീരിയിൽ പറയുന്നു. പ്രാദേശികമായ പശു ഇനങ്ങളുടെ പാൽ മഞ്ഞയായി കാണുന്നത് അതിൽ സ്വർണമുള്ളതിനാലാണ്. ഭൂകമ്പം ഉണ്ടാകുന്നത് പശുക്കളെ കൊല്ലുന്നതുകൊണ്ടാണെന്നും സ്റ്റഡി മെറ്റീരിയലിൽ പറയുന്നു.
