മെയ്ഡ് ഇൻ ഇന്ത്യ ഇമെയിൽ പ്ലാറ്റ്ഫോമായ സോഹോ മെയിലിലേക്ക് ചുവടുമാറികേന്ദ്ര ആഭ്യന്തരമന്ത്രി അമിത് ഷാ

മെയ്ഡ് ഇൻ ഇന്ത്യ ഇമെയിൽ പ്ലാറ്റ്ഫോമായ സോഹോ മെയിലിലേക്ക് കേന്ദ്ര ആഭ്യന്തരമന്ത്രി അമിത് ഷാ ചുവടുമാറി. പുതിയ ഇമെയിൽ ഐഡി X (ട്വിറ്റർ) വഴി പങ്കുവെച്ച അദ്ദേഹം, ഇനി മുതൽ കത്തിടപാടുകൾക്കായി സോഹോ മെയിൽ ഉപയോഗിക്കണമെന്ന് അറിയിച്ചു.

ജിമെയിൽ, മൈക്രോസോഫ്റ്റ് ഔട്ട്‌ലുക്ക് പോലുള്ള വിദേശ ഇമെയിൽ സേവനങ്ങൾക്ക് പകരമായ ദേശീയ പ്ലാറ്റ്ഫോം എന്ന നിലയിൽ സോഹോ മെയിലിന്‍റെ പ്രാധാന്യം ഇതിനാൽ വർധിക്കുമെന്ന് വിലയിരുത്തപ്പെടുന്നു. മുതിർന്ന കേന്ദ്രമന്ത്രി തന്നെ ഈ സേവനം സ്വീകരിച്ചതോടെ, വിവിധ കേന്ദ്ര സർക്കാർ വകുപ്പുകളും സ്ഥാപനങ്ങളും സോഹോയിലേക്ക് മാറാൻ സാധ്യത കൂടുതലാണെന്ന് സൂചനകൾ പറയുന്നു.

പ്രധാനമന്ത്രി നരേന്ദ്ര മോദിയുടെ “സ്വദേശി ടെക്” ആഹ്വാനത്തിന് പിന്നാലെ കഴിഞ്ഞ ദിവസങ്ങളിൽ മെയ്ഡ് ഇൻ ഇന്ത്യ ആപ്പുകൾക്ക് കൂടുതൽ ശ്രദ്ധയും പ്രചാരവുമാണ് ലഭിച്ചുവരുന്നത്. സോഹോയുടെ മെസേജിംഗ് ആപ്പായ ‘അരട്ടൈ’ക്കും ഇതിനോടൊപ്പം വൻ ജനപ്രീതി ലഭിച്ചു വരികയാണ്.

സോഹോ സ്ഥാപകനായ ശ്രീധർ വെമ്പു, ‘അരട്ടൈ’ ഉൾപ്പെടെയുള്ള വിവിധ സോഹോ ഉൽപ്പന്നങ്ങളെക്കുറിച്ച് നിരന്തരം പുതുക്കിയ വിവരങ്ങൾ പങ്കുവെച്ച് സൈബർ ലോകത്ത് സജീവമാണ്. ആൻഡ്രോയിഡ്, ഐഒഎസ് പ്ലാറ്റ്ഫോമുകളിൽ വോയ്സ്, വീഡിയോ കോളുകൾക്ക് പിന്തുണയുള്ള ഈ ആപ്പുകൾ ഗൂഗിളിന്റെയും മൈക്രോസോഫ്റ്റിന്റെയും സേവനങ്ങൾക്ക് നേരിട്ടുള്ള വെല്ലുവിളിയാണെന്ന് ടെക് വിദഗ്ധർ വിലയിരുത്തുന്നു.

സോഹോ മെയിൽ ഉപയോക്താക്കൾക്കും ബിസിനസ്സുകൾക്കും അനുയോജ്യമായ, പരസ്യരഹിത ഇമെയിൽ സേവനമാണ്. എൻഡ്-ടു-എൻഡ് എൻക്രിപ്ഷനിലൂടെ ഉപയോക്തൃ ഡാറ്റയുടെ സുരക്ഷ ഉറപ്പാക്കുകയും, വ്യക്തിഗത വിവരങ്ങൾ മൂന്നാം കക്ഷികൾക്ക് വിൽക്കില്ലെന്ന് കമ്പനി വ്യക്തമാക്കിയിട്ടുണ്ട്.

Tag: Union Home Minister Amit Shah steps up support for Made in India email platform Zoho Mail