ഉണ്ണികൃഷ്ണൻ പോറ്റിയെ ശനിയാഴ്ച ദേവസ്വം വിജിലൻസ് ചോദ്യം ചെയ്യും; ബംഗളൂരുവിൽ നിന്ന് തിരുവനന്തപുരത്ത് എത്തി

ശബരിമല ദ്വാരപാലക സ്വർണ്ണപാളി വിവാദത്തിൽ സ്പോൺസറായ ഉണ്ണികൃഷ്ണൻ പോറ്റിയെ ശനിയാഴ്ച ദേവസ്വം വിജിലൻസ് ചോദ്യം ചെയ്യും. ഇതിനായി അദ്ദേഹം ഇന്ന് ബംഗളൂരുവിൽ നിന്ന് തിരുവനന്തപുരത്ത് എത്തിയിട്ടുണ്ട്. ഉച്ചയ്ക്ക് ഏകദേശം 1.15ഓടെയാണ് കാരേറ്റിലെ വീട്ടിലെത്തിയത്.

2019 ജൂലൈ 20-ന് സന്നിധാനത്ത് നിന്ന് സ്വർണ്ണം പൂശുന്നതിനായി കൊണ്ടുപോയ സ്വർണ്ണപ്പാളി ഓഗസ്റ്റ് 25-ന് ചെന്നൈയിൽ എത്തിയിരുന്നു. ഇടയിൽ ഉണ്ടായിരുന്ന കാലയളവാണ് വിജിലൻസ് സംശയിക്കുന്നതെന്നും റിപ്പോർട്ടുകൾ പറയുന്നു.

അതേസമയം, “ആരാണ് ഉണ്ണികൃഷ്ണൻ പോറ്റി?” എന്ന ഹൈക്കോടതിയുടെ ചോദ്യത്തിന് ദേവസ്വം ബോർഡിന് വ്യക്തമായ മറുപടി നൽകാൻ കഴിഞ്ഞിട്ടില്ല. 2019-ലും 2025-ലും ദ്വാരപാലക സ്വർണ്ണപ്പാളി അദ്ദേഹത്തിന് കൈമാറാൻ കാരണമെന്തെന്ന ചോദ്യത്തിന്, ഉദ്യോഗസ്ഥ തല വീഴ്ചയാണ് സംഭവിച്ചതെന്ന് ദേവസ്വം ബോർഡ് പ്രസിഡന്റ് പി. എസ്. പ്രശാന്ത് സമ്മതിച്ചു.

ഇതിനിടെ, വിവാദത്തെ രാഷ്ട്രീയ ആയുധമാക്കാൻ യുഡിഎഫ് ശ്രമിക്കുകയാണെന്ന് ഭരണകക്ഷി ആരോപിക്കുന്നു. “സ്പോൺസറെ കുറ്റപ്പെടുത്തിയും ഉത്തരവാദിത്തം ഒഴിഞ്ഞുമാറിയും ദേവസ്വം ബോർഡിന് രക്ഷപ്പെടാനാവില്ല. അയ്യപ്പന്റെ പണം ദുരുപയോഗം ചെയ്തവർക്ക് ഒരിക്കലും ഗതി പിടിക്കില്ല” എന്ന് കെ. മുരളീധരൻ എം.പി. പറഞ്ഞു.

സിബിഐ അന്വേഷണം വേണമെന്നാണ് യുഡിഎഫ് കൺവീനർ അടൂർ പ്രകാശിന്റെ നിലപാട്. സ്വർണ്ണപ്പാളി കേസുമായി ബന്ധപ്പെട്ട വിജിലൻസ് അന്വേഷണം പുരോഗമിക്കുകയാണ്, ഈ മാസം 27-ന് പ്രാഥമിക അന്വേഷണ റിപ്പോർട്ട് കോടതിയിൽ സമർപ്പിക്കപ്പെടാനാണ് സാധ്യത.

Tag: Unnikrishnan Potty will be questioned by Devaswom Vigilance on Saturday; He has reached Thiruvananthapuram from Bengaluru