വിഷം കലർന്ന ഇന്ത്യൻ ചുമ മരുന്ന്; 24 കുട്ടികളുടെ മരണത്തിന് പിന്നാലെ കടുത്ത നടപടിക്ക് ഇന്ത്യയോട് ലോകാരോഗ്യ സംഘടന

ഇന്ത്യൻ മരുന്ന് കമ്പനി നിർമ്മിച്ച ചുമ മരുന്ന് കഴിച്ച് 24 കുട്ടികൾ മരിച്ച സംഭവത്തിൽ കൂടുതൽ വിൽപ്പന തടയാനുള്ള നടപടികൾ ശക്തമാക്കാൻ ലോകാരോഗ്യ സംഘടന (WHO) ഇന്ത്യയോട് ആവശ്യപ്പെട്ടു. ഇന്ത്യൻ കമ്പനിയായ ‘സ്രേശൻ ഫാർമ’ നിർമ്മിച്ച ‘കോൾഡ്രിഫ്’ സിറപ്പിൽ അനുവദനീയമായതിന്റെ 500 മടങ്ങ് ഡൈഎഥിലീൻ ഗ്ലൈക്കോൾ എന്ന വിഷവസ്തു അടങ്ങിയിരുന്നതായി പരിശോധനയിൽ കണ്ടെത്തിയിരുന്നു.

ഇന്ത്യയിൽ നിന്നും ഇന്തോനേഷ്യയിൽ നിന്നുമുള്ള സിറപ്പുകൾ കഴിച്ച് ലോകത്താകമാനം 300-ഓളം കുട്ടികൾ മരിച്ചതിനെ തുടർന്ന് ഇതിനെതിരായ വ്യവസ്ഥകൾ കർശനമാക്കുമെന്ന് ആഗോളതലത്തിൽ പ്രതിജ്ഞയെടുത്ത് രണ്ട് വർഷത്തിന് ശേഷമാണ് പുതിയ മരണങ്ങൾ റിപ്പോർട്ട് ചെയ്യുന്നത് എന്നതും ശ്രദ്ധേയമാണ്.

കയറ്റുമതി ചെയ്യുന്നതിന് മുമ്പ് ഡൈഎഥിലീൻ, എഥിലീൻ ഗ്ലൈക്കോൾ പോലുള്ള വിഷ പദാർത്ഥങ്ങൾ കണ്ടെത്താനായി മരുന്നുകൾ പരിശോധിക്കണമെന്ന് ഇന്ത്യ പുതിയ നിയമം കൊണ്ടുവന്നതായി ലോകാരോഗ്യ സംഘടനയിലെ ഉദ്യോഗസ്ഥനായ റുട്ടെൻഡോ കുവാന പറഞ്ഞു. എന്നാൽ, ഇന്ത്യക്കകത്ത് വിൽക്കുന്ന സിറപ്പുകൾക്ക് അത്തരമൊരു നിയമം നിലവിലില്ലെന്ന പാളിച്ച ഉദ്യോഗസ്ഥൻ ചൂണ്ടിക്കാണിച്ചു.

“ഇത് വെറും വ്യാജ മരുന്ന് വിൽപനയല്ല, മറിച്ച് ധാർമ്മിക പ്രശ്നമാണ്. നിങ്ങൾ നിയമങ്ങൾ പാലിക്കുന്നില്ലെങ്കിൽ അത് കുറ്റകരമാണ്, കാരണം ഇതിന് വിനാശകരമായ പ്രത്യാഘാതങ്ങളുണ്ട്,” നിലവാരമില്ലാത്തതും വ്യാജവുമായ മരുന്നുകൾ കൈകാര്യം ചെയ്യുന്ന ഡബ്ല്യു.എച്ച്.ഒയുടെ ടീം ലീഡർ കൂടിയായ കുവാന കൂട്ടിച്ചേർത്തു.

ലോകാരോഗ്യ സംഘടനയുടെ മരുന്നുകളിലെ വിഷാംശം പരിശോധിക്കുന്നതിനുള്ള പരിശീലന പരിപാടിയിൽ അയൽരാജ്യമായ പാകിസ്ഥാൻ ഉൾപ്പെടെയുള്ള രാജ്യങ്ങൾ പങ്കെടുക്കുകയും പുതിയതും ചെലവ് കുറഞ്ഞതുമായ ഒരു പരിശോധനാ രീതി വികസിപ്പിക്കുകയും ചെയ്തിട്ടുണ്ട്. എന്നാൽ, ഈ പരിശീലനത്തിൽ ഇന്ത്യയിൽ നിന്നുള്ള പ്രതിനിധികൾ പങ്കെടുക്കാതിരുന്നത് വലിയ നിരാശയാണ് നൽകിയതെന്ന് കുവാന പറഞ്ഞു.

“ഇത് നിരുത്തരവാദപരമായി സമീപിച്ച ഒരു കാര്യമാണ്. വിദേശത്ത് മരണങ്ങൾ ഉണ്ടായിട്ടും ഇന്ത്യയിൽ ആരെയും ജയിലിലടച്ചതായി രേഖകളൊന്നുമില്ല,” അദ്ദേഹം വ്യക്തമാക്കി.

കമ്പനികൾ അവരുടെ സൗകര്യങ്ങൾ ഒരു വർഷാവസാന സമയപരിധിക്കുള്ളിൽ അന്താരാഷ്ട്ര നിലവാരത്തിലേക്ക് ഉയർത്തിയാൽ, ഇന്ത്യ അതിന്റെ പുതിയ കയറ്റുമതി നിയമം നിർത്തലാക്കാൻ പദ്ധതിയിടുന്നതായി കഴിഞ്ഞ ആഴ്ച റോയിട്ടേഴ്സ് റിപ്പോർട്ട് ചെയ്തിരുന്നു. എന്നാൽ, ഈ വിഷയത്തിൽ ഇന്ത്യയുടെ ആരോഗ്യ മന്ത്രാലയമോ ഫെഡറൽ ഫാർമസ്യൂട്ടിക്കൽസ് റെഗുലേറ്ററായ സെൻട്രൽ ഡ്രഗ്സ് സ്റ്റാൻഡേർഡ് കൺട്രോൾ ഓർഗനൈസേഷനോ ഇതുവരെ പ്രതികരിച്ചിട്ടില്ല.

Tag: WHO urges India to take strict action after 24 children die of poisonous Indian cough medicine