ആഭിചാരക്രിയക്ക് സഹകരിക്കാത്തതിനെ തുടര്‍ന്ന് ഭാര്യയെ ആക്രമിച്ച സംഭവം; ഏരൂർ സ്വദേശിയായ ഉസ്താദിന്റെ മൊഴിയെടുക്കും

ആഭിചാരക്രിയക്ക് സഹകരിക്കാത്തതിനെ തുടര്‍ന്ന് ഭാര്യയുടെ മുഖത്ത് തിളച്ച മീൻകറി ഒഴിച്ച് പൊള്ളിച്ച സംഭവത്തിൽ ഏരൂർ സ്വദേശിയായ ഉസ്താദിന്റെ മൊഴിയെടുക്കാനൊരുങ്ങുകയാണ് പൊലീസ്. അന്വേഷണത്തിന്റെ ഭാഗമായി ഉസ്താദിനെ ചോദ്യം ചെയ്യുമെന്നും, ആവശ്യമെങ്കിൽ പ്രതിപ്പട്ടികയിലുൾപ്പെടുത്തുമെന്നും പൊലീസ് അറിയിച്ചു.
തിളച്ച മീൻകറി വീണതിനെ തുടർന്ന് ഗുരുതരമായി പൊള്ളലേറ്റ റജില ആശുപത്രിയിൽ ചികിത്സയിലാണ്. സംഭവത്തിന് ശേഷം ഭർത്താവ് സജീർ ഒളിവിലാണ്, ഇയാളെ കണ്ടെത്താൻ പൊലീസ് തിരച്ചിൽ ശക്തമാക്കിയിട്ടുണ്ട്. കുട്ടിയെ മർദിച്ചതിനും സജീറിനെതിരെ പ്രത്യേക കേസെടുക്കുമെന്ന് പൊലീസ് അറിയിച്ചു. റജിലയുടെ വിശദമായ മൊഴി ഉടൻ രേഖപ്പെടുത്താനാണ് തീരുമാനം.

ബുധനാഴ്ചയാണ് സംഭവം നടന്നത്. ആഭിചാരക്രിയയിൽ പങ്കാളിയാകാൻ നിരസിച്ചതിനെ തുടർന്ന് ഭർത്താവ് ഭാര്യയെ ആക്രമിച്ചെന്നാണ് പൊലീസ് കണ്ടെത്തിയത്. ഏരൂർ സ്വദേശിയായ ഉസ്താദ് നൽകിയ ‘ചരട്’ ആത്മസംരക്ഷണത്തിനുള്ളതാണെന്ന് പറഞ്ഞപ്പോൾ, അത് അണിയാൻ തയാറാകാതിരുന്നതാണ് ഭർത്താവിന്റെ ക്രൂരപീഡനത്തിന് കാരണമായത്. ഉസ്താദിന്റെ നിർദേശപ്രകാരം മുടി അഴിച്ച് സ്റ്റൂളിൽ ഇരിക്കാൻ ഭർത്താവ് ആവശ്യപ്പെട്ടതായും, അത് നിരസിച്ചതിനെ തുടർന്നാണ് തിളച്ച മീൻകറി മുഖത്ത് ഒഴിച്ചതെന്നും റജില മാധ്യമങ്ങളോട് പറഞ്ഞു. ഭർത്താവ് ഉസ്താദിനെ ഫോണിൽ വിളിച്ച് സംസാരിച്ചുവെന്നും, തനിക്ക് ഇത്തരം കാര്യങ്ങൾ ചെയ്യാൻ കഴിയില്ലെന്ന് താൻ പറഞ്ഞതായും അവൾ വ്യക്തമാക്കി.

റജിലയുടെ മൊഴിപ്രകാരം ഭർത്താവ് മുമ്പും നിരവധി തവണ ഉപദ്രവം നടത്തിയിട്ടുണ്ട്. പൊലീസിൽ പരാതി നൽകിയതിന് ശേഷമാണ് കുറച്ചുനാൾ അക്രമം നിർത്തിയത്, എന്നാൽ പിന്നീട് വീണ്ടും പീഡനം തുടർന്നു. മുൻപ് ഉസ്താദിന്റെ അടുത്തും തനിക്കെത്തേണ്ടി വന്നതായും അവൾ വ്യക്തമാക്കി. “സ്ഥലം വിൽക്കാനുള്ള കാര്യങ്ങൾ സംസാരിക്കാനാണ് കൊണ്ടുപോയതെന്നായിരുന്നു ഭർത്താവിന്റെ വ്യാഖ്യാനം,” റജില പറഞ്ഞു. ചിക്കൻപോക്സ് വന്നപ്പോൾ ശരീരത്തിൽ പാടുകൾ ഉണ്ടായതിനെ പരിഹസിച്ച് ഭർത്താവ് സംസാരിച്ചിരുന്നതായും, പ്രതികരിക്കാൻ തുടങ്ങിയതോടെയാണ് ക്രൂരപീഡനം വർധിച്ചതെന്നും റജില കൂട്ടിച്ചേർത്തു.

Tag: Wife attacked after she did not cooperate with witchcraft ritual; Ustad, a native of Erur, will be recorded