ലോറിയില്‍ നിന്ന് ആസിഡ് ദേഹത്ത് വീണ് ബൈക്ക് യാത്രികനായ യുവാവിന് ഗുരുതര പരിക്ക്
ലോറിയിൽ നിന്നു ചോർന്ന ആസിഡ് ദേഹത്ത് വീണ് ബൈക്ക് യാത്രികൻ ഗുരുതരമായി പൊള്ളലേറ്റു. തോപ്പുംപടി സ്വദേശിയായ ബിനീഷിനാണ് പരിക്കേറ്റത്. വെണ്ടുരുത്തി പാലത്തിനും തേവര ജംഗ്ഷനും ഇടയിൽ വെച്ചാണ് സംഭവം നടന്നത്.
അപകടം ഇന്നലെ വൈകീട്ട് ഏഴുമണിയോടെ സംഭവിച്ചു. ലോറി റോഡിലെ ഗട്ടറിൽ ചാടിയതോടെ, ലോറിയിൽ നിന്നുള്ള ആസിഡ് പിന്നിൽ ബൈക്കിൽ വന്ന ബിനീഷിന്റെ ദേഹത്തേക്ക് തെറിച്ചുവീണു.
ആസിഡ് കൂടുതലായും ബിനീഷിന്റെ കൈകളിലേക്കും കഴുത്തിലേക്കുമാണ് വീണത്. ഇയാൾ ഇപ്പോൾ എറണാകുളം ജനറൽ ആശുപത്രിയിലെ ഐസിയുവിൽ ചികിത്സയിലാണ്.
ലോറി ഉടമയെ വാഹനം ഹാജരാക്കാൻ എറണാകുളം സൗത്ത് പൊലീസ് നിർദ്ദേശം നൽകി. സുരക്ഷാ മാനദണ്ഡങ്ങൾ പാലിക്കാതെയാണ് ആസിഡ് കൊണ്ടുപോയതെന്നു പ്രാഥമിക വിവരം സൂചിപ്പിക്കുന്നു.
ലോറിയുടെ മുകൾ ഭാഗം അടച്ചിരുന്നില്ല എന്നാണ് അന്വേഷണത്തിൽ കണ്ടെത്തിയത്. നിയമാനുസൃതമായ സുരക്ഷാ നടപടികൾ പാലിച്ചിരുന്നെങ്കിൽ ഇത്തരം അപകടം ഒഴിവാക്കാമായിരുന്നെന്ന് വിദഗ്ധർ അഭിപ്രായപ്പെട്ടു.
Tag: Young biker seriously injured after acid falls on him from lorry
