ലോക്ഡൗണ്‍ ലംഘിച്ച്‌ അല്‍ ഫഹം; പൊലീസിനെ കണ്ട് ഓടെടാ ഓട്ടം
മഞ്ചേരി: ട്രിപ്ള്‍ ലോക്ഡൗണ്‍ ലംഘിച്ച്‌ നെല്ലിക്കുത്തില്‍ യുവാക്കള്‍ സംഘടിച്ച്‌ കോഴി ചുട്ടെങ്കിലും കഴിക്കാനുള്ള ഭാഗ്യമുണ്ടായില്ല. പൊലീസെത്തിയതോടെ പാതിവഴിയില്‍ ഉപേക്ഷിച്ച്‌ ഓടി രക്ഷപ്പെട്ടു. കഴിഞ്ഞ ദിവസം വൈകീട്ട് ആറിന് നെല്ലിക്കുത്ത് പഴയ ഇഷ്ടിക കമ്ബനിക്ക് അടുത്താണ് സംഭവം.
പ്രദേശവാസികളാണ് റബര്‍ തോട്ടത്തിനടുത്തുള്ള ഒഴിഞ്ഞ സ്ഥലത്ത് കോഴി ചുടാനുള്ള സജ്ജീകരണങ്ങളുമായി എത്തിയത്. പാചകം പുരോഗമിക്കുന്നതിനിടെ മഞ്ചേരി എസ്.ഐയുടെ നേതൃത്വത്തില്‍ പൊലീസ് എത്തിയതോടെ യുവാക്കള്‍ ചിക്കന്‍ ഉപേക്ഷിച്ച്‌ രക്ഷപ്പെടുകയായിരുന്നു.
ഗ്രാമപ്രദേശങ്ങളില്‍ ഇത്തരത്തില്‍ കൂട്ടംകൂടിയിരുന്ന് പാചകവും മീന്‍പിടിത്തവും വ്യാപകമാണ്. സംഘം ചേര്‍ന്നിരിക്കുന്ന ഷെഡുകള്‍ പൊലീസിെന്‍റ നേതൃത്വത്തില്‍ പൊളിച്ച്‌ മാറ്റുന്നുണ്ട്. വരുംദിവസങ്ങളില്‍ ആകാശ നിരീക്ഷണം നടത്തി നിയമലംഘകരെ പിടികൂടാനാണ് തീരുമാനം. ജില്ലയില്‍ എ.ഡി.ജി.പി, ഐ.ജി അടക്കമുള്ള ഉന്നത ഉദ്യോസ്ഥര്‍ ജില്ലയില്‍ ക്യാമ്ബ് ചെയ്താണ് പരിശോധനക്ക് നേതൃത്വം നല്‍കുന്നത്.
