ബാലുശ്ശേരിയില്‍ മത്സരിക്കാന്‍ ധര്‍മജന്‍ താല്‍പര്യം പ്രകടിപ്പിച്ചതായി യു.ഡി.എഫ് കണ്‍വീനര്‍ എം.എം.ഹസന്‍
തിരുവനന്തപുരം: നടന്‍ ധര്മ്മജന് ബോള്‍ഗാട്ടി നിയമസഭാ തിരഞ്ഞെടുപ്പില്‍ മത്സരിച്ചേക്കുമെന്ന സൂചനയുമായി യുഡിഎഫ് നേതൃത്വം. കോണ്‍ഗ്രസ് സ്ഥാനാര്‍ത്ഥിയായി മത്സരിക്കാന്‍ ധര്മ്മജന് താത്പര്യം അറിയിച്ചതായി യു.ഡി.എഫ് കണ്‍വീനര്‍ എം.എം.ഹസന്‍ വ്യക്തമാക്കി. കോഴിക്കോട് ജില്ലയിലെ ബാലുശ്ശേരി മണ്ഡലത്തില്‍ നിന്നാകും ധര്മ്മജന് മത്സരിക്കുക.
സംവരണമണ്ഡലമായ ബാലുശ്ശേരിയില്‍ നിലവില്‍ മുസ്ലിം ലീഗാണ് മത്സരിക്കുന്നത്. കഴിഞ്ഞ തവണ 15000-ത്തോളം വോട്ടുകള്‍ക്കാണ് സിപിഎം നേതാവും പുരോഗമന കലാസാഹിത്യസംഘം നേതാവുമായ പുരുഷന്‍ കടലുണ്ടിയോട് മുസ്ലിം ലീഗ് സ്ഥാനാര്‍ത്ഥി യു.സി.രാമന്‍ പരാജയപ്പെട്ടത്. ധര്മ്മജന് ബാലുശ്ശേരിയില്‍ മത്സരിക്കണമെങ്കില്‍ സീറ്റ് മുസ്ലിംലീഗില്‍ നിന്നും കോണ്‍ഗ്രസ് ഏറ്റെടുക്കേണ്ടതായി വരും.
കോണ്‍ഗ്രസ് ആവശ്യപ്പെട്ടാല്‍ ഇക്കുറി നിയമസഭ തിരഞ്ഞെടുപ്പില്‍ താന്‍ മല്‍സരിക്കുമെന്ന് കഴിഞ്ഞ ദിവസം ധര്‍മജന്‍ വെളിപ്പെടുത്തിയിരുന്നു. കേരളത്തിലെ ഏത് മണ്ഡലത്തിലായാലും സീറ്റ് സ്വീകരിക്കാന്‍ തയ്യാറാണെന്നും കോണ്‍ഗ്രസ് ടിക്കറ്റില്‍ മാത്രമായിരിക്കും മത്സരിക്കുന്നതെന്നും താരം പറഞ്ഞിരുന്നു.കോഴിക്കോട് ജില്ലയിലെ ബാലുശ്ശേരിയിലെ പൊതു പരിപാടികളില്‍ ധര്‍മജന്‍ സജീവമാണ്. കലാരംഗത്തും പൊതുരംഗത്തുമുള്ള നിരവധി പേരെ വീട്ടിലെത്തി കാണുകയും കോണ്‍ഗ്രസ് ജില്ലാ നേതാക്കളുമായി സംസാരിക്കുകയും ചെയ്തിരുന്നതായാണ് വിവരം.
സിപിഎം ശക്തികേന്ദ്രമായ ബാലുശ്ശേരിയില്‍ ധര്‍മ്മജനെ പോലെ ജനപ്രിയനായ ഒരാളെ സ്ഥാനാര്‍ത്ഥിയായി കൊണ്ടു വന്നാല്‍ മണ്ഡലം പിടിക്കാന്‍ പറ്റിയേക്കും എന്നാണ് കോണ്‍ഗ്രസ് കണക്കുകൂട്ടല്‍. എസ്.എഫ്.ഐ സംസ്ഥാന സെക്രട്ടറി സച്ചിന്‍ ദേവിനെയാണ് സിപിഎം സ്ഥാനാര്‍ത്ഥിയായി പരിഗണിക്കുന്നത്.
