റോഡില്‍ നിന്ന് ലഭിച്ച പവര്‍ബാങ്ക് ഉപയോഗിച്ച യുവാവിന് ദാരുണാന്ത്യം
ഭോപാല്‍: മൊബൈല്‍ ഫോണ്‍ ചാര്‍ജ് ചെയ്യാന്‍ ഉപയോഗിക്കുന്ന പവര്‍ബാങ്കിന് സമാനമായ ഉപകരണം പൊട്ടിത്തെറിച്ച്‌ 28 കാരന്‍ മരിച്ചു. റോഡില്‍ നിന്ന് കിട്ടിയ ഉപകരണം മൊബൈല്‍ ഫോണില്‍ ഘടിപ്പിച്ചപ്പോഴാണ് പൊട്ടിത്തെറിച്ചത്. മധ്യപ്രദേശിലെ ഉമരിയയിലെ ചര്‍പോഡ് ഗ്രാമത്തില്‍ വെള്ളിയാഴ്ചയാണ് സംഭവമെന്ന് പൊലീസ് വെളിപ്പെടുത്തി.
അതെ സമയം മരിച്ച യുവാവ് ഉപയോഗിച്ചത് പവര്‍ബാങ്ക് തന്നെയാണോയന്ന് ഉറപ്പ് വരുത്തിയിട്ടില്ല. മരിച്ച റാം സാഹില്‍ പാല്‍ തന്‍റെ കൃഷിയിടത്തിലേക്ക് പോകുന്ന സമയത്താണ് വഴിയരികില്‍ ഈ ഉപകരണം ശ്രദ്ധയില്‍പ്പെട്ടത് വീട്ടിലേക്ക് മടങ്ങിയ ഇയാള്‍ അയല്‍പക്കത്ത് വെച്ച്‌ മൊബൈല്‍ ഉപകരണത്തില്‍ ഘടിപ്പിച്ചപ്പോള്‍ പൊട്ടിത്തെറിക്കുകയായിരുന്നുവെന്ന് അയല്‍വാസികള്‍ പറഞ്ഞു. റാം സാഹില്‍ സംഭവ സ്ഥലത്ത് വെച്ച്‌ തന്നെ മരിച്ചു.
‘ഉപകരണം പവര്‍ബാങ്ക് ആണോ അതോ മറ്റ് ഏതെങ്കിലും വസ്തുവാണോ എന്ന് അറിയാന്‍ ഫോറന്‍സിക് പരിശോധനക്ക് അയച്ചു’-പൊലീസ് ഉദ്യോഗസ്ഥയായ ഭാരതി ജാട് പറഞ്ഞു. സ്ഫോടക വസ്തുവല്ല പൊട്ടിത്തെറിച്ചതെന്നാണ് പൊലീസിന്‍റെ പ്രാഥമിക നിഗമനം. സംഭവത്തില്‍ കേസ് രജിസ്റ്റര്‍ ചെയ്ത് അന്വേഷണം തുടങ്ങി.
